- Heildarnemendafjöldi tvöfaldast á síðustu árum
- Allar fagdeildir hafa vaxið
- fjölgun á öllum námsstigum
Mestur áhugi á búvísindum í ár
Góð aðsókn er í Landbúnaðarháskóla Íslands næsta haust en alls sóttu yfir 200 framtíðar-nemendur um nám á háskólabrautir eða í búfræði, en ekki er tekið inn í garðyrkjunám í ár. Flestar umsóknir bárust í BSc nám í búvísindum og næstflestar í landslagsarkitektúr.
Áhugavert er að skoða þróun síðustu ára, en heilt yfir hefur nemendafjöldi skólans tvöfaldast á undanförnum árum og á það við um öll námsstig, starfsmenntanám á framhaldsskólastigi, grunnnámið (BSc) og framhaldsnámið (MSc og PhD). Einnig er forvitnilegt að rýna í skiptinguna á milli brauta og hvernig þær hafa þróast, sem sýnir að öll fagsviðin eru í sókn. Haustið 2019 var áhugi nýrra nemenda mestur á skógfræði og náttúru- og umhverfisfræði. Ári síðar haustið 2020 féllu öll met í umsóknafjölda í landslagsarkitektúr og garðyrkju, nánar tiltekið í lífræna ræktun matjurta og ylrækt. Í ár eru það svo búvísindin sem heilla mest og rímar það vel við aðstæður í samfélaginu um þessar mundir þar sem áhugaverð og jákvæð umræða er um fæðuöryggi og landbúnaðarframleiðslu á Íslandi. Mikilvægt er að mennta fólk á því sviði til að takast á við áskoranir framtíðarinnar. Nýlega var lagt fram umræðuskjal um nýja landbúnaðarstefnu og unnið er að fæðuöryggisstefnu sem mun byggja á skýrslu sem Landbúnaðarháskólinn vann fyrir atvinnuvega- og nýsköpunarráðuneyti á síðasta ári.
Allar fagdeildir skólans eflast
Allar námsbrautir Landbúnaðarháskóla Íslands heyra undir þrjár fagdeildir sem eru Ræktun & Fæða, Náttúra & Skógur og Skipulag & Hönnun. Það er einkar ánægjulegt að sjá nemendafjöldann aukast á öllum deildum skólans og á undanförnum þremur árum hafa þær skipst á að eiga metaukningu í nemendafjölda.
Fagdeildirnar þrjár og námsbrautirnar þeirra fjalla um þau málefni sem eru hvað mikilvægust í umræðunni í dag og snúa að grundvallarþáttum í samfélagi okkar, en það eru matvælaframleiðsla og fæðuöryggi, þróun landbúnaðar, nýting náttúruauðlinda, skipulagsmál, umhverfis- og loftslagsmál, byggðaþróun og efnahagslífið í heild, með áherslu á sjálfbærni.
Skóli í sókn
Rannsóknatengt framhaldsnám hefur verið að eflast með nýjum samstarfsverkefnum og uppbyggingu innviða. Meistara- og doktorsnemendur hafa aldrei verið fleiri í sögu skólans og styður sú þróun við uppbyggingu þekkingar og almenna starfsemi skólans. Aukinn áhugi á starfsmenntanámi skólans hefur einnig verið vel sýnilegur og greinilegt að áherslur stjórnvalda um eflingu verknáms hafa skilað góðum árangri. Samhliða er unnið að því að styrkja endurmenntun í samvinnu við atvinnulífið og styðja betur við nýsköpun og þróun á landsbyggðinni.
Landbúnaðarháskóli Íslands er skóli í sókn og hefur í samstarfi og með góðum stuðningi stjórnvalda og samkeppnissjóða lagt aukna áherslu á að bæta innviði til kennslu og rannsókna og efla starfsemina enn frekar með öflugu samstarfi við hagaðila. Sá grunnur sem lagður er mun styðja við nýja landbúnaðarstefnu Íslands til framtíðar.
—
Nánari upplýsingar veitir Rósa Björk Jónsdóttir, útgáfu- og kynningarstjóri Landbúnaðarháskólans, í síma 843 5378 eða í rosabjork@lbhi.is.
